72歲拒絕退休！因老公打鼻鼾「意外創業」
銀髮夫妻一個月做$200萬生意
美國一對原本已經步入銀髮階段的夫妻，竟然因為「老公打鼻鼾」意外翻轉人生。這對資深創業家再次踏入商場，經歷過市場反應冷淡同埋社交平台封鎖後，單月營業額衝上 25萬美元（約 195萬港元）。
據外媒報導，現年72歲的 Lloyd Ecker 同太太 Sue Ecker 長期投身創業圈。早喺1983年開始，佢哋就經營過母嬰資訊平台同埋電商業務，之後仲成功賣盤賺咗數千萬美元。不過，兩位老人家並無選擇過退休生活。
人生的轉捩點竟然係日常嘅「打鼻鼾問題」。Lloyd 長期受打鼻鼾困擾，試過好多方法都無效，甚至要用呼吸機，但後來擔心安全問題而停用。結果，佢被太太「趕出房瞓」，反而激發咗佢解決問題嘅動力。
佢喺網上搜尋資料時，意外發現1888年醫學文獻提到嘅「高位呼吸姿勢」概念，於是同朋友合作研發泡棉枕頭。經歷多次改良後，推出咗名為「Snorinator」嘅止鼾產品，主打等用家維持半坐位睡眠，改善呼吸。
雖然產品有創意，但初期市場反應非常冷淡。夫妻二人自掏腰包投資創業，喺眾籌平台只係賣出大約一百件，廣告投放亦屢屢碰釘。更離奇嘅係，佢哋喺社交平台投放嘅廣告，因為畫面影住兩公婆同床，竟然被系統判定為「太過色情」而遭下架。廣告被封鎖咗幾個月先至重新上架，雖然生意額一度回升到 20萬美元（約 156萬港元），但之後又再跌過，生意幾乎停滯不前。
直到2025年，兩公婆上咗創業真人騷《Shark Tank》，獲得投資人 Michael Strahan 同 Lori Greiner 睇中，投入資金並入股。節目播出後帶動銷量短期內爆發，單月營業額達到 25萬美元（約 195萬港元）。但由於缺乏社交媒體營銷策略，增長動力再次放緩，令佢哋一度考慮執笠離場。
轉機出現喺2026年初。夫妻決定調整策略，減價並重新設計品牌網站，同時加強社交媒體內容，同埋搵短片創作者合作。結果一條 Instagram 片喺一日內突破百萬觀看，生意銷量迅速飆升，由每日5件暴增到30件，之後再成長到每日近100件，品牌每星期曝光率更加達到數百萬次。
目前 Snorinator 已經逐步打開國際市場，仲接到好多唔同國家嘅訂單。呢段由「打鼻鼾」出發、經歷過廣告風波同創業低谷嘅歷程，被外界形容為一場經典嘅「銀髮創業翻身戰」。
