香港裁縫業世界知名，當中克林頓、比爾蓋茨、米高積遜等名人都曾慕名來港訂製西裝，但不少人都認為裁縫業古舊導致它走向夕陽， William卻覺得裁縫師傅的經驗才是這行業最寶貴之處。 14年，他頂手了西裝店 Wayden Tailor，西裝全由老師傅製作，他希望讓這傳統技藝得到更多人的欣賞。

Wayden Tailor是一間恤衫及西裝訂造的裁縫店，店內恤衫售價由$450至$1,600不等，西裝則由$4,000至$20,000，全由三十多年經驗的裁縫師傅製作，質量上絕對有保證。老闆 William說︰「幫襯我哋嘅多數係中、高層人員，佢哋對衣料舒適及合身程度有要求，我哋嘅裁縫師傅嘅手工技藝都好熟練，完全滿足到客人嘅要求。」

修讀工商管理的 William，對裁縫業原本一竅不通，「出嚟社會做文員助理，之後慢慢從事 IT管理嘅事務。 14年，朋友話有間西裝店想請人幫手做 online marketing及電子化資料，推薦我去做。喺工作過程中，要了解西裝嘅製作程序，覺得呢行算係香港好寶貴嘅一項產業。」

William說將傳統行業電腦化有助提升客戶服務，「傳統西裝店都係用過底單簿去做紀錄，有時舊客唔得閒上嚟試身，話跟番上一套整就得，但時間耐咗，啲字可能會甩色，查找舊客資料又唔方便，都幾麻煩。但師傅慣咗喺張單 mark低唔同事項，跟住就黏上布料樣板，咁樣輸入電腦仲麻煩，於是決定用相機影低張單，然後擺番去電腦相應客人嘅 file，會容易睇圖及搜尋資料。」

頂手西裝店
經營西裝店並不是 William的既定計劃，因原本西裝店的店主忙於經營其他業務，找他頂手西裝店，「首先好現實咁講，我睇過盤數，知道有盈利，當時我接觸呢行都年幾，對呢行有咗感情，尤其對老師傅製作西裝呢個傳承。其實香港嘅度身訂造好出名及高質，想有個地方畀人欣賞到，於是就頂咗間鋪嚟做。」
初接手西裝店， William都是從中慢慢摸索及學習，「喺接手前，我有向前老闆取經，好似同製作工場溝通、入布料嘅途徑、如何定價等，自己又向師傅學吓打理西裝嘅事宜，好似點熨恤衫、分布料優劣等，增加對西裝嘅知識；同時同客人有多啲話題，都係做得多就得，唔係太難上手。」

加租轉做樓上鋪
16年因租約問題， Wayden Tailor由鰂魚涌搬去尖沙咀， William表示流失了不少客人，「當時零售業市道仲好，地鋪嘅租金仍然好高，業主話要加租，計過維持唔到惟有搬，有搵過附近地方有冇鋪位，但租金太貴，之後就搬咗去星光行樓上，轉咗地區有唔少客人冇再嚟幫襯。」
William表示全靠老經驗的裁縫師傅，才能留住客人，「我哋嘅西裝係全人手製作，坊間有啲話係度身訂造，其實有機會係幫你量完身，之後搵番相近尺寸嘅模再車套衫出嚟。我哋可以就每個人嘅細微位作出更改，最容易睇得出就係西裝腋下個位，有啲店會話改唔到，但我哋有得預位去改。」

夏季推涼爽布料
搬上樓上鋪後， William眼見少了人流，於是在推廣上花功夫，「正常夏季係訂造西裝嘅淡季，我哋會聯絡客人，推薦一啲較涼爽嘅布料，吸引到佢哋嚟訂造恤衫及西裝，佢哋試完覺得效果好，又再推薦朋友嚟造，生意比起同期好咗 1至 2成。」

更多有用資料:

申請減租信樣本

網上宣傳入門懶人包

政府基金資助一覽