郭少明回憶創業之路，1978年他與太太羅桂珍創立莎莎，當時並無周詳計劃，只是偶然下，郭太想頂下一間僅得40呎大小的細舖，該店寶號正是「莎莎」，頂手費兩萬元，銀碼之大，郭少明指「據我知道當時可以買層樓」。只是一名打工仔的他，當時反問太太：「錢從何來？」加上當時並無男士從事化妝品行業，故只敷衍太太一句，「你喜歡就做啦！」豈料郭太行動迅速，用存款及從外家籌錢，兩周後已帶他落商場睇舖，二人正式升格做小舖老闆。

郭少明亦變身成莎莎第一代買手，自此白天幫太太賣化妝品，夜晚返政府工，幾乎做足18個鐘，直至五年後公司生意穩定，他才辭去政府工全職投入。莎莎亦由原本只是銅鑼灣總統商場一個最細的舖位，其後頂手鄰舖擴充，三年內一間變兩間。

莎莎起初發展順利，直到1989年遇上難關，總統商場舖位業主大幅加租四、五倍，更限郭氏兩星期內回覆。當時郭少明覺得太貴兼事忙，晚了回覆，豈知對方已轉租他人。他形容事件是「一盤冷水淋落頭」，最終被迫轉做街舖。雖然街舖租金較商場貴六、七倍，卻令郭少明上了一課，「街舖物有所值！生意亦多了六、七倍。」是次經驗令他由滿足現狀的小老闆，慢慢了解莎莎的潛力，計劃加開分店。

然而，當年六四亦曾令郭少明一度停步，他憶述：「89年六四嗰陣我都有想過移民，兩公婆想去多倫多」，他指有這念頭全因當時整個總統商場的老闆都想移民，「隔離左右好多都計數，賣咗啲舖，揸住幾多百萬買層house（洋房），啲錢收息就夠養自己囉。」

「如果等死不如返香港等」

郭少明自言家族4、5代人，都帶着香港人勤勞的基因，不嫌辛苦，他本身已取得移民證，「但有一晚我哋兩公婆突然一齊彈起，嗰時仲好後生，我話我哋係咪喺到等死？如果等死不如返香港等呀！」故翌日即回流，「返香港好開心！以後都唔會再諗移民！」

更多有用資料:

申請減租信樣本

網上宣傳入門懶人包

政府基金資助一覽