邵氏兄弟同優酷合拍嘅網劇《飛虎之潛行極戰》，今個月14號喺大台首播，雖然唔少網民批評劇集槍戰場面得啖笑，而且劇情好多反駁位，但你咪理，大台話大陸同香港嘅點擊率好好，噚晚仲搞咗個慶功宴。

黃宗澤（Bosco）同吳卓羲兩位男主角，噚晚都有出席慶功活動，三哥苗僑偉就因為唔喺香港而缺席。日前，吳卓羲爆三哥越洋打電話畀佢，問佢有冇興趣一齊投資火鍋店，其他合夥人有曾志偉同Bosco，吳卓羲仲話，如果其他人搵佢就一定冇興趣，但三哥就唔同。至於噚晚Bosco被問到係咪會一齊投資？佢都認咗有呢件事，但就話詳情留待三哥公佈。

其實呢幾年Bosco都有投資搞生意，好似13年底佢投資咗400幾萬，喺九龍城南角道開嘅蠔吧，走中高檔路線，明星效應加上食客對蠔吧嘅口啤都唔錯，生意都算上咗軌道。不過，今日有周刊報道，話Bosco最近透過相熟經紀，計劃將舖頭秘密頂手，而且頂手費115萬仲比市價低咗三成，包埋店內所有生財工具。

走得咁急，Bosco係咪想將資金，轉去三哥嘅火鍋店就唔知喇，但報道就形容佢今次係「蝕讓」。Bosco今午接受《蘋果》電話訪問，笑笑口話：「嗰啲人睇過我盤數咩？又知我蝕？我只想搬大啲嘅舖，依家搵緊地方。」

更多有用資料:

申請減租信樣本

網上宣傳入門懶人包

政府基金資助一覽